Акафист Пресвятой Богородице пред иконой Киево-Печерской

Дата публикации или обновления 01.11.2016
  • Акафисты иконам Пресвятой Богородицы   Даты празднования икон Богородицы
  • Перед какой иконой Божией Матери о чем молятся   Иконография Богородицы
  • Образ Богородицы в Русской иконографии
  • "Успение" (Киево-Печерская) икона Божией Матери

  • Чудотворные иконы Пресвятой Богородицы по алфавиту:
      А   Б   В   Г   Д   Е   Ж   З   И   К   Л   М   Н   О   П   Р   С   Т   У   Ф   Х   Ц   Ч   Ш   Э   Ю   Я

    Кондак 1

    Избранной от всех родов Пресвятей Деве Марии Богородице, яко воистину плотию рождшей Иисуса Христа, Спаса и Бога нашего, Владычице всея вселенныя, избравшей вторым земным жребием своим гору Печерскую, и обитель иноком на ней создавшую, похвальная приносим пения. Ты же, о Всечестная наша Мати и Заступница, храни и спаси обитель Твою и всех нас от враг видимых и невидимых, да зовем Ти:

    Радуйся, Пресвятая Богородице Дево, Печерская похвало и наше утешение.

    Икос 1

    Ангел земный и человек небесный преподобный Антоний, прииде в земный жребий Твой на гору Афонскую, хотя спасти душу свою от суеты мира сего и скончати тамо житие свое земное. Ты же, Пресвятая Дево, избравши вторым жребием Своим гору Печерскую в новопросвещенной стране Русской, послала его яко апостола, да устроит обитель на ней, во славу Твою и соберет иноков, и да воспевают Ти тако:

    Радуйся, Всечестная наша Мати; радуйся, дивная наша Игумение. Радуйся, надеждо нашего спасения; радуйся, горы Печерския Хранительнице. Радуйся, живущих на ней иноков Руководительнице; радуйся, приходящих к ней на поклонение православных христиан Покровительнице.

    Радуйся, Пресвятая Богородице Дево, Печерская похвало и наше утешение.

    Кондак 2

    Ведый скорбный путь спасения для всех иночествовати хотящих, Господь наш Иисус Христос, повеле Матери Своей, да прострет Свой Божественный покров над горою Печерскою, да вси спасающиися на ней, видяще сие, с пpeподобными Антонием и Феодосием, вкупе взывают непрестанно Спасителю Богу: Аллилуия.

    Икос 2

    Разум имея Божественный преподобный Феодосий, от души возлюбив славу небесную, мир со всеми его прелестями возненавидев, прииде в Киев ко преподобному Антонию в пещере сущу, в нюже вселися, и вкупе со всеми отцы, подвизающимися тамо, воспевая Тя, Честнейшую всех ангел, тако:

    Радуйся, нашего спасения главизно; радуйся, радосте наша в сей и будущей жизни. Радуйся, отрадо Божественная Христовых подвижников; радуйся, яко Тобою вси святии спасаются. Радуйся яко вся вселенная Тобою украшается; радуйся, яко имя Твое от всех небесных чинов прославляется.

    Радуйся, Пресвятая Богородице Дево, Печерская похвало и наше утешение.

    Кондак 3

    Сила Вышняго осени подвижников пещерных, егда первый игумен, преподобный Варлаам, устрои храм во имя Твоего славнаго Успения, на верху пещеры и в нем прославляя Тебе, Честнейшую Херувим и Славнейшую без сравнения Серафим и Сыну Твоему вопия: Аллилуия.

    Икос 3

    Имый пламенное желание спасения, преподобный Антоний, егда устроися обитель на холме, в немже пещеры, нарицаемыя Дальния, иский безмолвия, преселися на холм, в немже раскопа пещеры Ближния, и тамо собра последователи себе, хотящих совершеннаго безмолвия, прославляя Тебе, свою Утешительницу тако:

    Радуйся, вселения райская Руководительнице; радуйся, в подвизех пещерных Укрепительнице. Радуйся, благое начало и славный конец всех святых жития; радуйся, святыя радости Божественная струя. Радуйся, цвете Божественнаго прозябения; радуйся, православнаго монашества украшение.

    Радуйся, Пресвятая Богородице Дево, Печерская похвало и наше утешение.

    Кондак 4

    Бурю сомнений грехолюбивых оставльше, возлюбивше тернистый путь спасения, стекошася иноцы в пещеру ко преподобному Феодосию. Он же, видя в ней тесноту, устрои на верху горы Печерския храм, и келии сооруди, и оградой огради, и тако устроися обитель во имя Твое, Владычице, в нейже монаси и вернии людие воспеша о Тебе Богу: Аллилуия.

    Икос 4

    Слышаша иноцы Печерстии, яко разбойницы окрасти храм Твой, Пречистая, хощут, моляху Тя о спасении его. Ты же, Всемилостивая, сотворила чудо еси: храм Твой показала еси в воздусе висящ, еже видяще разбойницы в ужасе разбегошася, иноцы же Ти воспеша тако:

    Радуйся, яко на горе Киевстей духовный сад насадила еси; радуйся, яко тамо живущим вся потребная подала еси. Радуйся, собравшая нас от мира греховнаго; радуйся приведшая нас во ограду обители Печерския. Радуйся, защищающая нас от врагов видимых; радуйся, охраняющая нас от супостат невидимых.

    Радуйся, Пресвятая Богородице Дево, Печерская похвало и наше утешение.

    Кондак 5

    Боготечная звезда мира явилася еси Владычице, егда восхотела устроити Себе в Руси обитель Печерскую. Место, идеже имать храм во имя Твое создатися, указала еси огненною дугою, протяженною от ветхаго монастыря, и Ангелы во образе иноков на воздусе тамо грядущих, еже видящи иноцы Печерстии, воспеша радостную песнь: Аллилуия.

    Икос 5

    Видевше гречестии каменоздателие в Царьграде юношей, повелевающих им ити во Влахернский храм к Царице, приидоша вонь и узреша тамо Тя седящу во славе, предстоящим Тебе ликом воев и преподобным Антонию и Феодосию. Ты же, о Владычице, повелела еси им идти в землю Русскую во град Киев и устроити храм во имя Твое, предавше им икону славнаго Твоего Успения и мощи святых мученик. Они же, повеленное слышавше, воспеша Тебе тако:

    Радуйся, Цapицe небеси и земли; радуйся, истинная Мати нашего Спасителя. Радуйся, спасшая весь род Адама падшаго; радуйся, веры православныя Воеводо непобедимая. Радуйся, покровительнице Царьграда непостыдная; радуйся, и страны Русския Заступнице усердная.

    Радуйся, Пресвятая Богородице Дево, Печерская похвало и наше утешение.

    Кондак 6

    Проповедницы Твоего чудеснаго явления во Влахернстей церкви гречестии каменоздателие, приидоша в Киев, ко преподобным Антонию и Феодосию, предаша им икону Твоего Успения и мощи святых мученик и поведаша им Твою волю о созидании храма во имя Твое; тии же слышавше глаголы их, образу Твоему, на иконе изображенну, поклонишася, Богу же вопиюще: Аллилуия.

    Икос 6

    Возсия яко солнце икона Твоего Успения, Пресвятая Дево, юже пpинесоша из Царьграда гречестии каменоздателие во обитель Печерскую, в нейже и до ныне пребывает, подающи исцеления, вопиющим к Тебе тако:

    Радуйся, во Успении Твоем нас не оставляющая; радуйся чрез икону Твою нам помогающая. Радуйся иконою Твоею обитель Печерскую прославившая; радуйся, иконою Твоею гору Печерскую просветившая. Радуйся, иконою Твоею град Киев спасающая; радуйся, тою же иконою всю Русскую землю охраняющая.

    Радуйся, Пресвятая Богородице Дево, Печерская похвало и наше утешение.

    Кондак 7

    Хотяще устроити новую обитель и в ней храм во имя Твое, Преблагословенная Дево, преподобнии Антоний и Феодосий молиша Сына Твоего Христа Бога нашего и Тeбе, да познают место, на немже создан быти храм, и указа Господь то место, якоже быти по всей земли росе, а тамо суше; и паки повсюду суше, на месте же храма росе, и посла огнь с небесе и пожже вся хврастия и росу полиза и долину устрои. Преподобнии же вкупе с верными людьми, тамо сущими, падоша на землю, со страхом возопише: Аллилуия.

    Икос 7

    Новый храм, небеси подобный, начаша созидати Богоноснии отцы Антоний и Феодосий, по смертном же успении их преподобный Стефан сконча и и пресели братию из ветхаго монастыря в новый. Блаженный же Никон иконами, златом и сребром чудно украси; в сем же храме собравшеся вернии, прославляху Тя, Богородице, сице:

    Радуйся, варяга Симона во обитель Твою чудно призвала еси; радуйся, принесенным им поясом размер xpaма Твоего указала еси. Радуйся, злато на устроение храма Твоего чрез греки подавшая; радуйся, в созидании храма Твоего невидимо пособствовашая. Радуйся, Лавры Печерския строительнице; радуйся, храмов ея украсительнице.

    Радуйся, Пресвятая Богородице Дево, Печерская похвало и наше утешение.

    Кондак 8

    Странное чудо показася, егда украшаху храм Твой, Пречистая, мусиею; тогда во алтаре на стене сам изобразися образ Твой преподобному Алипию со иконописцы ту сущими и просветися паче солнца. И се из уст образа Твоего, Пресвятая, излете голубь бел, и летяше ко образу Спасителеву, и ко другим образом написанным во храме, и паки лете ко образу Спасителеву и влете во уста Его и тамо скрыся. Еже видящи гречестии иконописцы, во обители Твоей и живот свой скончаша, мощи же их в пещерах положени быша, душами же на небеса преселишася, идеже прославляют Тебе со Ангелы, Сыну же Твоему зовут: Аллилуия.

    Икос 8

    Весь храм, небеси подобный, сияющий от Твоея иконы Печерския, Богоизбранная Дево, блаженный Захария виде, прииде к нему защищения у Тебе прося, егда заимодавец его Сергий не хотяще отдати ему злато и сребро, оставленное отцем сего. Ты же, Владычице, послала еси Ангела наказати клятвопреступника, еже видя Захария остави мир, прииде во обитель Печерскую и поживе в ней до конца дней своих, воспевая Тебе сице:

    Радуйся, Честнейшая всея твари вселенныя; радуйся, Сладчайшаго Иисуса селение. Радуйся, святый Покрове жизни нашея; радуйся, благодатное утешение скорби нашея. Радуйся, вся наша надеждо и покой; радуйся, по Бозе наше упование в жизни земной.

    Радуйся, Пресвятая Богородице Дево, Печерская похвало и наше утешение.

    Кондак 9

    Всякoe мудрование отвергше, удивимся чудесем Твоим, Богородице, егда бо приспе время освящению храма Твоего, дска каменна на Престол невидимо принесена бысть Ангелы, имиже во образе юношей созвани быша святители на освящение, якоже Апостоли Христовы собрани быша на Погребение Твое. Святитель Иоанн, иноцы Печерскии и вси людие, зряще сия, прославиша Тебе, Пречистая, радостно праздновавше праздник освящения, Богу воспеша песнь: Аллилуия.

    Икос 9

    Витии многовещании не могут восхвалити Твоя чудеса, Богородице, соделанныя во обители Печерстей, наипаче при основании, создании и освящении храма в честь славнаго Успения Твоего; и ныне не оставляй нас, недостойных чад Твоих, сохраняй обитель Твою, да вопием Ти тако:

    Радуйся, яко Сам Бог Отец назнамена сушею место храма; радуйся, яко Твой Сын, иже сниде яко роса на руно во Твое чрево, на тожде место росу испусти. Радуйся, яко Дух Святый огнь с неба ниспосла на попаление места для храма; радуйся, яко Бог Отец образ Твой во алтаре невидимо изобрази. Радуйся, яко Бог Сын, Солнце правды, сиянием церковь Твою исполни; радуйся, яко Святый Дух видением голубя, излетевшаго из уст образа, в храме Твоем показася.

    Радуйся, Пресвятая Богородице Дево, Печерская похвало и наше утешение.

    Кондак 10

    Спасти хотя душу свою, преподобный Алипий, прииде во Твою обитель, Богородице, и бысть тамо искусен иконописец, чрез негоже прославлялася, Богоневесто; иконы бо им писанныя быша чудодейны, просияша бо паче солнца. Некия же иконы ангели писаша и иными многими чудесы прославишася. От нихже и до ныне некия сохранишася, источающе чудеса прославляющим Тя и Богу вопиющим: Аллилуия.

    Икос 10

    Стена крепкая и заступление явилася еси, Владычице, новой обители Твоей Свенской, егда князь Роман проси иноков Печерских отпустити икону чудотворную, писанную преподобным Алипием, для исцеления от слепоты. Егдаже пловущии с Твоею иконою присташа к брегу, обретеся икона Твоя невидимо на горе на древе; юже обретоша, и князь Роман получи прозрение очесем своим, созда тамо обитель, собра иноки и вкупе с ними возопи к Тебе тако:

    Радуйся, иконы Твоя чудесы прославившая; радуйся, яко Лавру Печерскую ими же прославила еси. Радуйся, и новую обитель Свенскую возлюбила еси; радуйся, яко и в ней икону Твою чудотворную показала еси. Радуйся, яко дивна и велика чудеса от нея явила еси; радуйся, всем просящим у Тебе, чрез икону Твою исцеления источила еси.

    Радуйся, Пресвятая Богородице Дево, Печерская похвало и наше утешение.

    Кондак 11

    Пение умиленное приносят пред иконою Твоею Печерскою не токмо во граде Киеве, но и в Свенске, в Москве и Ярославле и в других градех и весех правовернии людие, призывающе Тебе на помощь вкупе с преподобными Антонием и Феодосием, и получивше от Тебе, Богородице, помощь и заступление, вопиют Сыну Твоему и Богу: Аллилуия.

    Икос 11

    Светоприемную свещу, просвещающую всех, Тебе призывающих, имея мир христианский Тебе, Дево Богородице, наипаче Лавра Печерская, прославляет Тя, свою Покровительницу, юже храниши бо ю многа лета от нахождения агарян и всяких враг, и от еретиков и междоусобныя брани, и от нападения иноплеменник. Аще же иногда и попускала ей разоренней быти грех ради наших, но паки благолепнейшу воздвизала еси ю, и дарми земными снабдевала насельников ея и дарами благодати обогащала, вопиющих Ти сице:

    Радуйся, иконою Успения Твоего нас защищающая; радуйся, нерукотворенным образом Твоим нас покрывающая. Радуйся, Печерскою иконою Твоею исцеления нам подающая; радуйся, Свенским образом Твоим нас покрывающая. Радуйся стольный град Москву Печерскою иконою посетившая; радуйся, и град Ярославль Твоею иконою озарившая.

    Радуйся, Пресвятая Богородице Дево, Печерская похвало и наше утешение.

    Кондак 12

    Благодать Божественную, покров и заступление подаждь нам, Владычице наша и Мати, припадающим пред икон Твоею Печерскою. Воздвигни нас от греховнаго сна, сохрани Лавру Твою и нас недостойных чад Твоих, сподоби нас жительствовати во ограде обители Печерския до конца дней наших, и прославляти Тя и Сына Твоего, Христа Бога нашего, поюще Ему: Аллилуия.

    Икос 12

    Поюще Твоя милости и чудеса, явленныя во обители Печерстей от лет древних и до ныне, покланяемся пред образом Твоим, имже спасаеши нас, и всех призывающих Тебе на помощь и вопиющих Ти тако:

    Радуйся, торжество веры православныя в Лавре Печерстей являющая; радуйся, сердца человеческая любовию о Бозе распаляющая. Радуйся, гору Печерскую, яко вторый Синай прославившая; радуйся, иконы Твоя, яко проповедницы спасения показавшая. Радуйся, с небесных высот на нас призирающая; радуйся, на благая деяния нас наставляющая.

    Радуйся, Пресвятая Богородице Дево, Печерская похвало и ваше утешение.

    Кондак 13

    О Всепетая наша Мати, Преславная Владычице Богородице! Приими сия похвалы и моления, от скверных устен и нечистаго сердца возносимыя; сохрани обитель Твою, нашими грехми оскверненную; собери нас, расточенных, и сподоби в чине ангельстем достигнути Небеснаго Царствия, и вкупе с преподобными Антонием и Феодосием и всеми угодники Печерстими, прославляти вечно Тебе, нашу Матерь, и Сына Твоего и Бога, и пети песнь: Аллилуия.

    (Этот кондак читается трижды, затем икос 1 и кондак 1)

    Молитва первая

    О, Пресвятая и Пренепорочная Дево Богородице, наша Печерския похвало и украшение, покрове и заступление, истинная Владычице избраннаго удела Твоего; приими нас, недостойных рабов Твоих, убогое моление с верою и любовию приносящих пред чудным образом Твоим; да посетиши милостивно греховное житие наше, просвещающи светом покаяния, осени нас, обремененных скорбьми многими, Твоею небесною радостию, и сподоби нас присно славити Тя в мире и благочестии во обители Печерстей, да без порока прешедше путь жития нашего, помощию Твоею достигнем вечнаго веселия во светлостех святых и Богоносных отец наших Антония и Феодосия и всех преподобных Печерских, и едиными усты и сердцы воспоем Тя и Предвечнаго Сына Твоего, со Безначальным Его Отцем и Пресвятым, Всеблагим, Животворящим и Единосущным Его Духом во веки веков. Аминь.

    Молитва вторая

    О, Пресвятая и Преблагословенная Мати Господа и Спаса нашего Иисуса Христа, Пречистая Приснодево Богородице Марие! Припадаем и покланяемся Тебе пред святою и чудотворною иконою Твоею, юже от лет древних чудесы многими и исцеленьми прославити благоизволила еси. Смиренно молимся Тебе, Благой и Милосердой Заступнице нашей: предстательством угодников Твоих, преподобных Антония и Феодосия Печерских, вонми гласу грешных молений наших, не презри воздыханий от души, виждь скорби и беды нас обышедшия, и яко любвеобильная воистину Мати потщися на помощь нам беспомощным, унылым, многая и тяжкия грехи впадшим и присно прогневляющим Господа и Создателя нашего, Егоже умоли, Предстательнице наша, да не погубит нас со беззаконии нашими, но да явит нам человеколюбивую Свою милость. Испроси, Владычице, у благости Его всем православным христианом здравие и душевное спасение, благочестное и мирное житие, земли плодоносие, воздуха благорастворение, дожди благовременныя, и благословение свыше на вся благая дела и начинания наша; болящия исцели, скорбящия утеши, бедствующим помози; споспеши всем нам носити иго Xристово в терпении и смиренномудрии, и сподоби нас благочестно житие земное скончати, христианскую же непостыдную кончину получити и Небесное Царствие унаследити. О, Царице Всепетая, Мати Божия Всеблагая! Простри Богоноснии руце Твои к возлюбленному Сыну Твоему и Богу нашему, умоли Его спасти и избавити от погибели вечныя всех иноков обители Твоея Печерския. Якоже же древле на горе Печерстей милость являла еси, Владычице, сице и ныне яви, Богородице, Твоя щедроты над обителию Твоею и над нами недостойными чады Твоими; да и зде, в земном странствовании нашем, и по кончине живота нашего будем прославлять Безначальнаго Отца, Единороднаго Его Сына, и Единосущнаго и Святаго Его Духа, и Твое милостивное предстательство во веки веков. Аминь.

    Тропарь, глас 4

    Днесь светло торжествует Печерская обитель и радуется явлением образа Богоматере безмерный лик Печерских отцев, с нимиже и мы непрестанно вопием: Радуйся, Благодатная, Печерская похвало.

    В начало

     
    Rambler's Top100