Повесть о Луке Колочском
Успенский Колоцкий женский монастырь.
Повесть о Луке Колочском.
(Древнерусский текст)...Небесныя Силы и души праведных мысленно
торжествуют, радующеся, мы же на ню взирающе,
к Богородице со слезами вопием:
О, Всемилостивая Госпоже, Владычице Богородице,
молися из Тебе Воплощенному Христу Богу нашему,
да подаст мир и здравие Христианом по велицей
и неизреченней Своей Милости.
(Тропарь)
В того же лета от Можайска за пятнадцать верстъ во отчине князя Ондрея Дмитриевича, внука Иванова, правнука Иванова ж, праправнука Данила Московскаго, явися знамение в Колочи.
Некий человекъ, именемъ Лука, простых людей, ратаев убогих, в последней нисщете сый, на некоемъ древе в некоемъ месте обрете икону Пречистыя Богородицы, держашу на руку Младенецъ Господа нашего Исуса Христа. Со единыя страны иконы тоя на затворце образ Николы чюдотворца, а з другую Илии пророка. И вземъ ю и целова с верою многою и постави ея у нивы своея на месте просте на древе. И прииде инъ некий человекъ и взять ю у него. Лука ж моливъ его, давъ ему хлебъ овсянъ, и взять к себе паки икону, и поиде с нею в дом свой.
И бысть в дому его разслабленъ человекъ лежаща многа леть. Лука же показа ему икону, и како наиде ея и поведе ему вся. Человекъ же инъ разслабленный удивися и моляше Луку, да принесеть к нему икону тую; Лука же принесе к нему. Разслабленый же приложи чело и очи и устне ко святей иконе Божия Матери и в той час воста весь здравъ, яко ж никогда же болев.
И сие слышано бысть от всих, тамо живущих, и стекошася мнозии, приносоша болящия и недужныя, и вси здравии быша. И начата приходити оттовсюду людей множество, приношаху недужныя, и разслабленныя изсцелевахуся. И многа чюдеса безсчислена бываху, и начаша чтити Луку вси люди, яко же пророка Ильи, апостола его имеяху великой чти и славе. Лука же поиде со иконою из Колочи к Можайску. И яко же приближашася ко граду, изыде во стретение князь Ондрей Дмитриевичь з боляры своими и весь градъ от великихъ и до малых да иже до сущихъ млеко. И быша знамения и чюдеса многа от иконы Божия Матери.
Таже оттуду поиде Лука со иконою к Москве, и стретоша ея со кресты митрополит со епископы и со всем священнымъ соборомъ.
Тако же и князи и княгини з детми своими, и бояре, и воеводы и вси велможи и все православное крестьянство множество. И быша чюдеса безсчисла многа: слепии прозираху, хромии хожаху, разслаблены востаху, немии глаголаху, глусии слышаху, во всяком недузе сущий здравии бываху. И что много глаголати, елико не может умъ человечь зрещи безпрестани тогда бываемых тмы тмами безсчисленных неизреченных чюдес.
И хожаше Лука от града во градъ со иконою Божия Матери, и везде чюдеса безсчисленная и неизреченна бываху от то иконы Божия Матери. И вси даяху Луке: князи, и бояре, и вси православные крестьяне, - имения многа в милостыню, и в честь, и в дары, и чествоваху Луку, яко апостола.
Лука же бысть отнюд простъ человекъ, яко от последних поселянъ, но и добродетель законную имеюще в себе.
И возвратися паки в первое место своею иконою с чюдотворною на Колочю и со всем своим богатством, а богатства много безсчислено собра. И постави двор себе, яко некий князь, храмы светлый и велици, и слуг много собра, престоящих и предтекущих ему отроков много имеяще, во ут-варех украшени. И трапеза его много брашна имееши, тучных и драгих и питий благовонных много, и ядяше и упивашеся со и сущими его служатели. И на ловы ездяше съ ястребы, и соколы, и з кречаты, и псов множество имеяше, и медведи имаше, и сими тешашеся.
От то иконы же пречистыя Богородицы чюдеса многи бываше, ея же Лука во церкви постави, создании от него, идеже ныне манастырь стоит Колоцкий. И приходящий оттовсюду одержими всякими недуги, изецеление приимаху.
Сотвори же ся Лука напрасен и безстуден. Егда убо ловцы князя Ондрея Дмитриевича съ ястребы и соколы повелениемъ князя своего на лов выезжаху, он же соколников бияше и грабяше и ястребы и соколы себе взимаше. И се ни единою, ни дважды, но многажды и всегда бываше.
Князь же Ондрей Дмитриевич терпяше вса сия, иногда же посылаше к нему, он же к нему жестоко и сурово отвещеваше. Князь Ондрей же Дмитриевичь смирениемъ и терпениемъ смолчеваше. Та ж нача ловчих княже Ондреевых бити и грабити, и медведи и с ларми взимаше к себе, и с ними веселяшеся и утешашеся.
По сем же некий жесток был ловчей у князя Ондрея Дмитриевича, и приготовив время, и улови медведя зла и люта суща и повеле его вести близ двора Лукина. Лука же видев из хором своих и выиде сам к медведю со служащими его и повеле ловчему князе Ондрееву пустити его у себя во дворе. Ловчей же княж Ондреев лукавство сотвори над Лукою: той час пусти медведя, и приде медведь на Луку, а Лука не успе вскоре отойти, и взаша медведь Луку, едва отняша Луку от медведя, точию дышуща.
И в той час пригна к Луке князь Ондрей Дмитриевич, и видев Луку в последних дышуща, и рече к нему: «Почто еси бесовское позорище и пласание возлюбил и пьянству совокупилса, како тя Бог прославил Своея Матери, Пречисты Богородицы образомъ чюдотворнымъ, ты ж сия ни во что положи, но к неполезному мирскому житию сшел еси, тако тебе и случися».
Он же плакаше и слезы точа и моляшеся ему, полезное устроити по немъ. Князь же Ондрей Дмитриевич многим его безсчисленым имениемъ на том месте манастырь постави во имя Пречистыя Богородицы и глаголемы Колочский, и чюдотворную икону Божия Матери в нем постави, иже чюдеса творит и до сего дни с верою приходящим.
Лука же в немъ и пострижеса и поживе в немъ неколико лет и во умилении и в слезах, дондеже и преставися и положен в нем.
Далее
