Акафист Пресвятой Богородице пред иконой Прусиотисса
Чудотворные иконы Пресвятой Богородицы по алфавиту:
А Б В Г Д Е Ж З И К Л М Н О П Р С Т У Ф Х Ц Ч Ш Э Ю Я
Икона Божией Матери «Прусиотисса».
Кондак 1
Избранней от всех родов Божией Матери и Царице, прекланяющей на милосердие Сына Своего и токи целебныя изливающей верным от святыя иконы Своея, благодарственная приносим пения. Ты же, Всемилостивая Заступнице, яко предстательство ко Господу имущи, ускори на помощь к нам и от всяких бед избави, да зовем Ти: Радуйся, Благодатная Богородице Дево, иконою Твоею нас присно утешающая.
Икос 1
Ангелов Царице и всея твари Владычице, преславным явлением образа Твоего всю страну Греческую озарила еси и струи чудес многих от нея источила еси. Мы же, радости о сем исполняеми, устне наша с любовию отверзаем, глаголюще сице: Радуйся, благодать Свою первописанней иконе Твоей даровавшая. Радуйся, дивную икону Твою «Прусиотиссу» тояжде благодати причастну соделавшая. Радуйся, моления верных милостиво приемлющая. Радуйся, плач и слезы скоро утоляющая. Радуйся, с высоты небесныя лучами милости земнородных озаряющая. Радуйся, о спасении рода человеческаго Господа умоляющая. Радуйся, Благодатная Богородице Дево, иконою Твоею нас присно утешающая.
Кондак 2
Видящи поругание святых икон, императором Феофилом творимое, юноша некий, взем образ Богоматере из града Пруса, во иную страну отъиде. Егда же путь свой творяще, сокрыся от него икона сия. Он же неутешен пребывая, но Промыслу Божию себе вдая и все упование свое на Господа возложив, воспе: Аллилуиа.
Икос 2
Разумом своим постигнути не возмогши, идеже икона Твоя святая пребывает, юноша, печален сый, в путь свой отъиде. По мале же времени, храм во имя Святыя Премудрости Божия воздвигнув, прилежно в нем моляшеся, скорбь сердца своего услаждая, вопиюще Тебе, Владычице сице: Радуйся, Утешительнице всех страждущих и скорбящих. Радуйся, Заступнице всех беды и напасти терпящих. Радуйся, Путеводительнице спасения ищущих. Радуйся, непостыдное Упование надежду на Тя возложивших. Радуйся, милостиво руце Свои к нам простирающая. Радуйся, любовию Своею сердца наша умягчающая. Радуйся, Благодатная Богородице Дево, иконою Твоею нас присно утешающая.
Кондак 3
Силу Божественныя благодати даруеши, о Богомати, всем усердно Сыну Твоему и Богу служащим, можеши бо у Него испросити вся, елика хощеши. Сего ради, благодаряще Господа за великия Его милости, Тобою нам ниспосылаемыя, вопием: Аллилуиа.
Икос 3
Имея простоту душевную и помысл чист, пастух некий сподобися образ Твой святый, небесною славою сияющ, в пещере узрети и пение ангельское слышати. Сего ради возрадовася радостию неизреченною и, падше на лице свое, тако возопи Ти, Пречистая: Радуйся, Богоизбранная Отроковице, Мати Дево. Радуйся, небесе и земли Царице. Радуйся, честнейшая Херувим. Радуйся, славнейшая без сравнения Серафим. Радуйся, от Ангел на небеси воспеваемая. Радуйся, от человек на земли прославляемая. Радуйся, Благодатная Богородице Дево, иконою Твоею нас присно утешающая.
Кондак 4
Бури житейския избежавши, в тихое пристанище под осенение иконы Твоея притекают вси скорбящии и обремененнии, и утешение благодатное получают от Тебе, Владычице мира, восхваляя матерния щедроты Твоя песнию: Аллилуиа.
Икос 4
Слышавше о чудесех Твоих, Пречистая, от иконы Твоея бываемая, юноша, скорбящий о лишении чудотворнаго образа Твоего, устремися к пещере, идеже икона Твоя чудесне явися. Егда же узре Лик Твой, Владычице, славою сияющ, уразуме, яко се есть икона, от поругания им некогда спасенная. Темже, припадше ко образу Твоему, возопи со умилением таковая: Радуйся, Мати Преблагая, скорби наша в радость претворяющая. Радуйся, Одигитрие, по стези спасения нас путеводящая. Радуйся, Отрадо, благодать Свою в сердца верных изливающая. Радуйся, Утешение, тишину и покой в души наша вселяющая. Радуйся, небесных благ Ходатаице. Радуйся, спасения нашего Споручнице. Радуйся, Благодатная Богородице Дево, иконою Твоею нас присно утешающая.
Кондак 5
Боготечная звезда явися икона Твоя, Владычице, путь спасения указующая: егда бо образ Твой от юноши, несшаго его во страну свою, удалися, и паки в тойже пещере чудесне обретеся, сим волю Твою святую ему указала еси. Он же, в чудеси сем промышление Божие о себе разумев, возопи с любовию: Аллилуиа.
Икос 5
Видевше на камени следы стоп Твоих, Пречистая, и глас Твой услышав, разуме юноша оный шествие Твое к месту явления пречуднаго образа Твоего; егда же к пещере возвратися и паки икону Твою тамо узре, абие намерение в сердце свое положи: мир оставити и Тебе, Владычице, служити. Обитель же на месте сем устроив и в ней вселися, со смирением вся дни живота своего вопияше Ти: Радуйся, даров Божия благодати сокровищнице неистощимая. Радуйся, чудес реко приснотекущая. Радуйся, ангельских умов удивление. Радуйся, человеческаго рода украшение. Радуйся, Благая Помощнице к Тебе притекающим. Радуйся, скорая Заступнице на Тя уповающим. Радуйся, Благодатная Богородице Дево, иконою Твоею нас присно утешающая.
Кондак 6
Проповедует Святая Церковь милости Твоя и чудеса, Пресвятая Дево, от иконы Твоея «Прусиотиссы» бываемая, и светло торжествует, воспевая величия Твоя. Ты же, о Богомати, услышав моления наша, ускори избавити нас от враг видимых и невидимых, и исцеление подаждь немощствующим душам и телесем нашим, да радостно вопием о Тебе Богу: Аллилуиа.
Икос 6
Возсияла еси многими лучами чудес, Богородице Пречистая, чрез святую икону Твою помощь и исцеление верным обильно подающи. Сего ради и нас, Владычице, душевно ослепленных, просвети Светом Сына Твоего и Бога нашего, да зовем Ти таковая: Радуйся, Благая Утешительнице, слезы страждущих изсушающая. Радуйся, Обрадованная, печаль нашу в радость претворяющая. Радуйся, Купино Неопалимая, от огненнаго запаления жилища наша сохраняющая. Радуйся, Неувядаемый Цвете, в чистоте души наша соблюдающая. Радуйся, Нечаянная Радосте, надеждею спасения нас возвеселяющая. Радуйся, погибших Взыскание, из греховныя бездны нас изымающая. Радуйся, Благодатная Богородице Дево, иконою Твоею нас присно утешающая.
Кондак 7
Хотящи новое знамение милосердия Своего явити, Преблагословенная Дево, во обители Твоей, в нейже икона Твоя светло красуется, жену некую, младенца во объятиих своих держащую, с высоты спадшую дивно от смерти спасла еси, да чудо видяще вси воспоют Богу, Тобою нас спасающему: Аллилуиа.
Икос 7
Новое и дивное чудо явила еси братии обители Твоея, Владычице, егда посреде камене источник воды попечительно им открыла еси; они же благодарни суще за великия щедроты Твоя, воспеша Ти тако: Радуйся, Домостроительнице, житие наше добре устрояющая. Радуйся, Живоносный Источниче, духовную жажду нашу утоляющая. Радуйся, небесе и земли Царице, врата райския нам отверзающая. Радуйся, матернею Твоею любовию всех объемлющая. Радуйся, Церкви Православныя благолепное украшение. Радуйся, по Бозе вся наша надеждо и упование. Радуйся, Благодатная Богородице Дево, иконою Твоею нас присно утешающая.
Кондак 8
Странники и пришельцы есмы в мире сем, но к кому прибегнем, Владычице, в скорбех странствия нашего, аще не к Тебе, Всеблагая? Не отвержи нас, Мати Божия, но помилуй нас, сирых и безпомощных, да радостно вопием о Тебе Богу: Аллилуиа.
Икос 8
Все множество чудес Твоих, Пречистая, несть исчислити возможно, яко бо звезды небесныя неисчетны суть, всем бо милости Твоя подаеши от чудотворнаго образа Твоего: болящия исцеляя, скорбящия утешая и всем во всякой нужде помощь скорую подавая. Мы же, Тобою ущедряеми, воспеваем Ти хваления таковая: Радуйся, Целительнице наша в болезнех телесных. Радуйся, Радосте наша в печалех наших душевных. Радуйся, страждущим скорую помощь подающая. Радуйся, слепым прозрение телесное и душевное дарующая. Радуйся, яко от нападений вражиих нас защищаеши. Радуйся, яко во бранех со страстьми нас укрепляеши. Радуйся, Благодатная Богородице Дево, иконою Твоею нас присно утешающая.
Кондак 9
Всякия утоляеши болезни и скорби, и всем во обстоянии сущим простираеши руку помощи, о Богомати: избавила бо еси некоего раба Твоего Иоанна от рук пленивших его, и обитель Твою многажды от разорения и врагов дивно спасала еси. Сего ради прихождаху ко образу Твоему чудотворному старцы и юноши, богатии и убозии, монаси и мирстии, помощи и заступления у Тебе просяще и Богу о Тебе вопиюще: Аллилуиа.
Икос 9
Ветии многовещанныя недоумевают, како по достоинству восхвалити вся чудеса Твоя, Богородице, от святыя иконы Твоея «Прусиотиссы» бываемая. Мы же, любовию к Тебе побеждаеми, в простоте сердечней дерзаем воспевати Тебе тако: Радуйся, неисчерпаемый источниче чудес. Радуйся, неоскудеваемый кладезю милостей. Радуйся, чистейший образе целомудрия. Радуйся, девства сосуде избранный. Радуйся, Хранительнице всех и утверждение. Радуйся, всех верных священное прибежище. Радуйся, Благодатная Богородице Дево, иконою Твоею нас присно утешающая.
Кондак 10
Спасти хотяй род человеческий от вечныя муки и непрестающия скорби, Человеколюбец Господь дарова нам Тебе, Матерь Свою, в помощь, покров и защиту, да будеши обидимым Заступницею, болящим Целительницею, скорбящим Утешительницею, да всех спасеши и от бед избавиши поющих: Аллилуиа.
Икос 10
Стеною и ограждением чудотворная икона Твоя явися, от всех наветов вражиих дивно защищающая; якоже бо иногда братию обители Твоея от разорения спасла еси, тако и нас защити и сохрани, Всеблагая, невредимы от всех напастей и нестроений, да спасаеми Тобою верно вопием: Радуйся, всякия милости Подательнице. Радуйся, чтущих Тя милостивая Покровительнице. Радуйся, явлением иконы Твоея тьму лютых обстояний отгоняющая. Радуйся, лучами чудес Твоих всех просвещающая. Радуйся, ходатайством Твоим Бога умилостивляющая. Радуйся, хранящим заповеди Его наследие благ вечных подающая. Радуйся, Благодатная Богородице Дево, иконою Твоею нас присно утешающая.
Кондак 11
Пение похвальное воспеша Ти, Целительнице Благая, сродницы отрока Кимона за дивное избавление от недуга, его гнетущаго: егоже от расслабления телеснаго помазанием елея от иконы Твоея «Прусиотиссы» дивно восставила еси, да здрав сый душею и телом, Сыну Твоему, Подателю всех благ, вопиет: Аллилуиа.
Икос 11
Светозарную икону Твою, Владычице, со благоговением зрят вси, с верою и любовию притекающии к ней, веруют бо яко с нею благодать Твоя выну пребывает. Приими же, Пресвятая Дево, веру и усердие наше, направи путь наш на стези правды, умоли Господа и Сына Твоего, да спасет нас и причастниками вечных благ соделает взывающих Ти: Радуйся, Всемилостивая Царице, милость Свою на нас простирающая. Радуйся, Чадолюбивая Мати, заступление Свое нам дарующая. Радуйся, любящия и чтущия Тя от всяких бед избавляющая. Радуйся, обетовании благими души верных веселящая. Радуйся, подвижников благочестия к Горнему Сиону путеводящая. Радуйся, верных к Небесному Иерусалиму приводящая. Радуйся, Благодатная Богородице Дево, иконою Твоею нас присно утешающая.
Кондак 12
Благодатию Божественною осеняема, Пресвятая Владычице, месту святому запустению предатися не попустила еси: егда бо икона Твоя «Прусиотисса» из обители во дни лишений тяжких изнесена бысть, Ты, во образе Монахини дивной, лампаду присногорящею в храме соблюдала еси, да видящии чудо сие воспоют Богу: Аллилуиа.
Икос 12
Поюще неисчетная знамения и чудеса Твоя, Пресвятая Дево, припадаем к пречистому образу Твоему и, умильно лобызающе его с трепетом и любовию, восхваляем вся милости и благодеяния Твоя сице: Радуйся, Присноблаженная, превыше небес превознесенная. Радуйся, Небесная Владычице, Живоначальныя Троицы благодатию осененная. Радуйся, милостей, щедрот и любве неизчерпаемый источниче. Радуйся, всех верных ограждение и священное прибежище. Радуйся, матерним попечением Твоим всех нас объемлющая. Радуйся, Покровом Своим всю землю покрывающая. Радуйся, Благодатная Богородице Дево, иконою Твоею нас присно утешающая.
Кондак 13
О Всепетая Мати Христа Бога нашего, приими сие малое моление наше, от любящих сердец Тебе приносимое, и умоли Всеблагаго Бога явити на нас неизреченное милосердие Свое: спасти души наша и причастниками жизни вечныя нас соделати, да поем Ему вовеки: Аллилуиа.
(Этот кондак читается трижды, затем икос 1 и кондак 1)
Молитва
Царице моя Преблагая, Надеждо моя Пресвятая! Се бедный грешник предстоит Тебе! Не остави мене, всеми оставленнаго, не забуди мене, всеми забытаго, даждь ми радость, неведущему радования. О, тяжки мои беды и скорби! О, безмерны мои грехопадения! Яко тьма нощная - житие мое. И несть в сынех человеческих ни единаго сильнаго ми помощи. Ты - Единая моя Надежда. Ты - Единый мой Покров, Прибежище и Утверждение. Дерзновенно простираю к Тебе немощныя мои руце и молю: умилосердися о мне, Всеблагая, пощади искупленнаго Кровию Сына Твоего, утоли болезни многовоздыхающия души моея, укроти ярость ненавидящих и обидящих мя, возстави силы моя увядающия, обнови, яко у орляте, юность мою, не попусти ослабнути в делании заповедей Божиих. Огнем небесным коснися смущенныя души моея и исполни ю веры непостыдныя, любве нелицемерныя и надежды известныя. Да всегда пою и славлю Тебе, Преблагословенную мира Заступницу, и покланяюся Сыну Твоему и Спасу нашему, Господу Иисусу Христу, со Безначальным Его Отцем и Жизнеподательным Духом Святым во веки веков. Аминь.
Тропарь, глас 1
Возсия в земли Элладстей, яко солнце светозарное, Твоя, Владычице, икона, озаряющи чудес сиянием преславно всех выну приходящих к ней с верою и любовию. Подаеши бо, Благая, от нея недужным исцеление и слепым прозрение, грешников спасаеши и от всяких бед избавляеши. Сего ради с веселием вопием: Слава преславно Рожденному от Тебе, слава Тобою Чудодействующему, слава милости Своя Тобою нам Подающему!
Кондак, глас 3
Явления честнаго Твоего образа, Богородице Дево, радостно совершаем празднество, обретохом бо в нем пристанище в бурях житейских и спасение всенадежное. Сего ради воспеваем величия Твоя и со умилением, припадающе, молимся: спасай нас иконою Твоею, Дево Всепетая.
