Акафист Пресвятой Богородице пред иконой «Избавительница»

Дата публикации или обновления 01.11.2021
  • Акафисты иконам Пресвятой Богородицы   Даты празднования икон Богородицы
  • Перед какой иконой Божией Матери о чем молятся   Иконография Богородицы
  • Образ Богородицы в Русской иконографии
  • "Избавительница" икона Божией Матери

  • Чудотворные иконы Пресвятой Богородицы по алфавиту:
      А   Б   В   Г   Д   Е   Ж   З   И   К   Л   М   Н   О   П   Р   С   Т   У   Ф   Х   Ц   Ч   Ш   Э   Ю   Я

    Кондак 1

    Возбрани врагом нашим озлобляти нас и от Господа нашего отлучати конечне и нас научи пети Тебе, Богородице, весело:

    Радуйся, от горя, бед и гибели спасающая нас, бедствующих Избавительнице.

    Икос 1

    Ангелов множество по Твоему, Мати наша, повелению ополчаются на избавление наше грозно. Ты же приими молитву сию:

    Радуйся, ангелов на спасение наше посылающая; радуйся, Царице горних чинов, небесную их помощь нам дарующая. Радуйся, ангелом хранити нас повелевающая; радуйся, воинством ангельским врагов наших поражающая.

    Радуйся, от горя, бед и гибели спасающая нас, бедствующих Избавительнице.

    Кондак 2

    Видят бедствующие толикую и многую помощь Твою сердечно Тя призывающим и наставляются тем пети Сыну Твоему непрестанно: Аллилуия.

    Икос 2

    Разумеют мнози, яко мирови Тя дарова Сын Твой избавительницу бедствующим, темже поем Тя сице:

    Радуйся, бедствующих Мати; радуйся, страждущих утешение. Радуйся, болящих исцеление; радуйся, ненадежных надеждо.

    Радуйся, от горя, бед и гибели спасающая нас, бедствующих Избавительнице.

    Кондак 3

    Сила Вышняго даровася Ти на помощь и спасение миру и нас, в бедах погибающих. И кто Тобою не избавлен бысть, и кто же не поет Сыну Твоему: «Аллилуия»?

    Икос 3

    Имущи непостижимую любовь к роду человечу, кая воздыхания не прияла еси, кия слезы не отерла еси, и кого не принудила еси призывати Тя? Темже приими от нас похвалы сия:

    Радуйся, бедствующих скорое услышание; радуйся, погибающих известное спасение. Радуйся, печальных и скорбных утешение; радуйся, плененных свобождение.

    Радуйся, от горя, бед и гибели спасающая нас, бедствующих Избавительнице.

    Кондак 4

    Буря несчастий налете на ны, спаси убо нас погибающих, спаси, Избавительнице наша, бурю погибельную на земли Укротившаго показующая нам и приемлющаго нашу песнь: Аллилуия.

    Икос 4

    Слышаша человечестии роди всю Твою к христианам дивную любовь и Твое мощное избавление их от всяких находящих на них лютых, научишася пети Тебе: Радуйся, человеческаго рода от бед избавление; радуйся, бурь житейских прекращение. Радуйся, уныния прогонительнице; радуйся, радости по скорби нам подательнице.

    Радуйся, от горя, бед и гибели спасающая нас, бедствующих Избавительнице.

    Кондак 5

    Боготечней звезде подобящися, мрак и темноту в грехолюбивых сердцах разгоняющи, да во свете Твоея любве узрят Господа и воспоют Ему: Аллилуия.

    Икос 5

    Видеша людие Российстии Твое не чаянное от многоразличных бед избавление, радостно поют Тебе сице:

    Радуйся, в бедах наша помощнице; радуйся, скорбей наших отъятие. Радуйся, печалей наших отгнание; радуйся, в скорбех наших утешение.

    Радуйся, от горя, бед и гибели спасающая нас, бедствующих Избавительнице.

    Кондак 6

    Проповедуют помощь Твою и любовь, Мати, исцеленнии, утешеннии, обрадованнии и спасеннии Тобою от бед, и поют Твоему высокодержавному Сыну: Аллилуия.

    Икос 6

    Возсиял есть нам свет спасения во мгле погибели, окружившей нас, и наставил пети Тебе, Владычице:

    Радуйся, мрак душ наших просвещающая; радуйся, тьму греховную потребляющая. Радуйся, светом радости души ободряющая; радуйся, мглу греха разгоняющая.

    Радуйся, от горя, бед и гибели спасающая нас, бедствующих Избавительнице.

    Кондак 7

    Хотящим нам конечному отчаянию предатися, отовсюду бедам належащим, помыслихом же о Тебе, Избавительнице, и ободрихомся и утешихомся, поюще Сыну Твоему: Аллилуия.

    Икос 7

    Новую и нежданную показала еси нам милость Свою, под державную руку Твою нас восприимши, и отвсюду вопием Ти:

    Радуйся, Царице державная; радуйся, и нас под Твою державу восприявшая. Радуйся, защиту Твою нам даровавшая; радуйся, врагов наших поразившая.

    Радуйся, от горя, бед и гибели спасающая нас, бедствующих Избавительнице.

    Кондак 8

    Странное чудо: на погибель обреченнии и в нуждах томящиися безчисленни внезапу спасение и избавление получают от Тебе, поюще Богу: Аллилуия.

    Икос 8

    Вси сущии во мраце скорбей, вси обуреваемии несчастий бурею, приидите к доброму пристанищу и нашему поможению, покрову Девы избавительницы, вопиюще Ей:

    Радуйся, радостей источниче; радуйся, печалей прогнание. Радуйся, бед избавление; радуйся, всяческаго покоя подательнице.

    Радуйся, от горя, бед и гибели спасающая нас, бедствующих Избавительнице.

    Кондак 9

    Все существо человеческое хвалит Тя, вси воспевают Тя, многоразличное избавление несущую, вместо печалей радость подающую поющим Сыну Твоему и Богу: Аллилуия.

    Икос 9

    Ветия многоумнии обезумеша, видяще Твое скорое чудесное от бед страждущих избавление, и умолкоша, нам поющим Ти:

    Радуйся, чудесы мир удивившая; радуйся, чудесы нас укрепившая. Радуйся, безбожие чудесами истребившая; радуйся, врагов силою Божиею посрамившая.

    Радуйся, от горя, бед и гибели спасающая нас, бедствующих Избавительнице.

    Кондак 10

    Спасти хотя всяку душу человечу, всею любовию печешися о ней, дондеже научиши ю пети Сыну Твоему: Аллилуия.

    Икос 10

    Стеною, мир христианский хранящая и всяку душу от врагов ограждающая явися икона Твоя, Избавительнице, в мире православнем и чудесы прославися, Тебе людем Божиим воспевающим:

    Радуйся, наставнице наша; радуйся, избавительнице наша. Радуйся, веселие наше; радуйся, вечная радосте наша.

    Радуйся, от горя, бед и гибели спасающая нас, бедствующих Избавительнице.

    Кондак 11

    Пение непрестанно приносим Ти, Владычице, Тобою избавленнии и Тобою паки радость обретшии и Божественному Сыну Твоему поющии радостно: Аллилуия.

    Икос 11

    Светосияющим светилом лучезарным во мраце греха явися нам икона Твоя, Избавительнице, наставляющая нас пети Тебе:

    Радуйся, от глада нас избавляющая; радуйся, вредоносящее естество от растений отгоняющая. Радуйся, посевы и леса, и все растущее от погибели спасающая; радуйся, земледельцев скорбящих утешение и труда их благословение.

    Радуйся, от горя, бед и гибели спасающая нас, бедствующих Избавительнице.

    Кондак 12

    Благодать, от иконы Твоея, Избавительнице, текущая, исцелений струи подающая и сердца веселием оживляющая, побеждает всех волею пети, Мати, Сыну Твоему и Богу: Аллилуия.

    Икос 12

    Воспеваем исцеления, от святыя иконы Твоея бываемыя, воспеваем наипаче воскресение Анастасия отрока и воспевающе поем:

    Радуйся, мертвых воскрешающая; радуйся, умершая сердца оживляющая. Радуйся, от смерти и вечнаго огня изымающая; радуйся, посмертное наше упование и защито.

    Радуйся, от горя, бед и гибели спасающая нас, бедствующих Избавительнице.

    Кондак 13

    О Всепетая, вселюбимая наша Мати! Умилосердися ныне и помилуй, в лютых и безысходных сущих нас скорбех избавляющи, научи нас сердечно воспевати Богу прощающему нас: Аллилуия.

    (Этот кондак читается трижды, затем икос 1 и кондак 1)

    Молитва

    О, Мати Божия, помоще наша и защито, присно буди избавительница наша, на Тя бо уповаем и всегда вседушно Тя призываем, умилосердися и помози, пожалей и избави, приклони ухо Твое и наша скорбныя и слезныя молитвы приими, и якоже хощеши успокой и обрадуй нас, любящих Твоего возлюбленнаго Сына, Емуже слава, честь и поклонение, со Отцем и Святым Духом, во веки веков. Аминь.

    В начало